O'tkir appenditsit asoratlari

O'tkir appenditsit asoratlari

Appendikular infiltrat (chegaralangan peritonit) — ingichka ichak qovuzloqlari, katta charvi, yo'g'on ichakning bir-biri va parietal qorin pardasi bilan qo'shilib ketgan birgalikdagi yallig'lanishi bo'lib, uning markazini yallig'langan chuvalchangsimon o'simta va atrofida yig'ilgan ekssudat tashkil etadi. Uning vujudga kelishi negizida, inson organizmining qorin bo'shlig' ida joylashgan biror-bir a'zosida yallig'lanish jarayoni paydo bo'lsa, uni chegaralash yoki cheklash maqsadida, unga boshqa a'zolarning kelib yopishishi yotadi. Odatda, bu jarayon, kasallik boshlanishining 3—4 sutkasidan boshlab, yallig'langan chuvalchangsimon o'simtaga yaqin joylashgan barcha a'zolar uni o'rab oladi va appendikular infiltrat shakllanadi. Kuchli og'riqlar bu jarayon boshlanishi bilan bosilib, simillaydigan holga o'tadi. Qorin paypaslab ko'rilganda, o'ng yonbosh sohasida zich-elastik konsistensiyali o'smasimon tuzilma aniqlanadi. Odatda, u harakatsiz, chanoq kletchatkasi bilan qo'shilib ketgan bo'ladi. Appendikular infiltrat operatsiyaga birdan bir monelik qiladigan hol hisoblanadi va muolaja yo'li bilan davolanadi. Uning kechuvida asosan 2 yo'nalish mavjud bo'lib, so'rilib ketishi yoki yiringlashi mumkin bo'ladi.