AGROMETEOROLOGIYADAN AMALIY MASHG’ULOTLAR

AGROMETEOROLOGIYADAN AMALIY MASHG’ULOTLAR

1. METEOROLOGIK STANSIYALAR VA POSTLARNI TASHKIL QILISH

Mashg’ulotning maqsadi: Meteorologik stansiyalar va postlarni tashkil qilish tamoyillari bilan tanishish hamda meteorologik maydonchaning tuzilishini o’rganish.

Topshiriqlar:

1. Darslik va o’quv qo’llanmalaridan foydalanib, meteorologik stansiyalar va postlarni tashkil qilishni o’rganing; 

2. Meteorologik maydoncha va postning tarhini chizish;

3. Meteorologik maydoncha va postda o’rnatiladigan asboblarning o’rnatish tartibini ishchi daftarga yozing;

4. Kuzatish muddatlari va kuzatish tartibini daftarga yozing.

Kerakli materiallar va asboblar: meteorologik stansiya ma’lumotlari, darslik va o’quv qo’llanmalari, jadvallar, meteorologik maydoncha tarhi, ishchi daftar, chizg’ich va boshq.

1. Meteorologik stansiyalar va postlar

Atmosferadagi fizikaviy jarayonlarning hosil  bo’lishida ishtirok etadigan kattaliklarga meteorologik elementlar deyiladi. Insoniyatning xo’jalik faoliyatiga kuchli ta’sir ko’rsatadigan asosiy meteorologik elementlarga quyosh radiatsiyasi, atmosfera bosimi, havo harorati va namligi, shamol, bulutlilik, yog’inlar, tuproq harorati va namligi, bug’lanish kabilar kiradi.

Meteorologik tadqiqotlar, asosan, kuzatish, ma’lumotlarni tahlil qilish orqali  olib boriladi. Meteorologik kuzatishlar maxsus asboblar yordamida meteorologik elementlarning son qiymatlarini aniqlaydi. Atmosferadagi hodisalarni vizual ravishda kuzatish natijasidagina ularni tavsiflash mumkin.

Dunyoning barcha meteorologik stansiya va postlarida yagona dastur asosida kuzatishlar olib boriladi. Ob–havo to’g’risidagi ma’lumotlarni tuzishda Yerning sun’iy yo’ldoshlari, tele– va radiometrik, aviatsion va avtomatik stansiyalardan olingan ma’lumotlar nihoyatda qimmatli hisoblanadi. Meteorologik stansiyalar va postlar bajaradigan ishining hajmiga ko’ra bir necha (I, II, III) turlarga, bajaradigan ishining mazmuniga ko’ra esa, asosiy va maxsus stansiya hamda postlarga bo’linadi.