Агрегатларни тузиш

Агрегатларни тузиш

Агрегатларни тузиш- аниқ шароитда агротехника талабларига мувофиқ ишларнинг юқори сифатда бажарилишини, машиналардан унумли фойдаланишни, энг юқори иш унуми ва тежамкорликни таъминлайдиган агрегатларни танлашдан иборат. Бунда агрегатнинг энергия манбаи, яъни, двигателнинг қувватидан тўлиқ фойдаланиш учун энергетика воситаларининг тортиш хусусиятларини ҳамда машинанинг қаршиликларини ҳисобга олиш зарур.

Двигател қувватидан тўлиқ фойдаланмаслик агрегатнинг фойдаланиш кўрсатгичларини пасайишига, бинобарин, берилган ҳажмдаги ишларни белгиланган агротехника муддатларида бажариш учун бўлган эҳтиёжнинг (талаб этиладиган  агрегатлар сонини) ошишига сабаб бўлади. Бу эса, ўз навбатида хўжаликнинг қишлоқ хўжалик агрегатларидан фойдаланиш самарадорлигига салбий таъсир кўрсатади.

Тўғри тузилган агрегат қуйидаги:

• технологик ишларнинг агротехника талабларига мувофиқ юқори сифатда бажарилишини;
• аниқ иш шароитларига, яъни ишлов бериладиган майдоннинг катталигига, ишлов бериладиган материалларнинг ҳолатига мос келишини; 
• двигател қувватидан тўлиқ фойдаланишни, қабул қилинган узатмада тракторнинг тортиш кучидан йўл қўйилган чегараларда фойдаланишни;
• ишлов бериладиган майдон ва йиғиштириб олинган маҳсулот бирлигига энг кам меҳнат, энергия ва ёқилғи сарфланишини;
• чаққонлик (маневр)хусусиятларини ва хизмат кўрсатиш қулайлигини;
• агрегатда ишлайдиган механизатор ва ёрдамчи ишчиларга оид меҳнат муҳофазаси ва теҳника ҳавфсизлиги талабларига жавоб беришини таъминлаш керак.

Қишлоқ хўжалик агрегати қуйидаги тартибда тузилади:

технологик ишнинг шароитлари ва агротехника талаблари аниқланади; 

•    трактор ва қишлоқ хўжалиги машинасининг русуми танланади;
•    технологик ишни бажариш учун йўл қўйиладиган тезликлар чегарасига мос ҳолда  агрегат тезлиги танланади ва унга кўра тракторнинг иш узатмаси аниқланади;
•    агрегатдаги машиналарнинг максимал қамраш кенглиги ва сони аниқланади;

-  агрегат амалда тузилади, яъни қишлоқ хўжалиги машинаси тракторга тиркалади ёки ўрнатилади, сўнгра  технологик созланади (агротехника талабларига мувофиқ ишчи қисмлар ўрнатилади ва ростланади) ҳамда йўналтирувчи қурилмалар ўрнатилади.

Тузилган машина-трактор агрегати махсус майдочада ёки дала шароитида ишлатиб кўрилади ҳамда унинг кўрсатгичлари баҳоланади.