Jizzax suv Ombori

Jizzax suv ombori Respublikamizda joylashgan quyilma suv omborlaridan biri boʻlib, Sangzor daryosidan kanal orqali suv oladi. Suv omborining qurulishi 1963- 1973 yillarni oʻz ichiga oladi. Jizzax suv ombori toʻligʻicha 1973 yil 27-dekabrda foydalanishga topshirildi. Suv bilan qoplangan maydon 13,75 km2 ni tashkil etadi. Loyiha boʻyicha 8,9 ming gektar sugʻoriladigan yerlarni suv bilan ta’minlash koʻzda tutilgan. Baliq mahsulotini yetishtirish va rekreatsiya maqsadlarida foydalanilmaydi. Jizzax suv ombori joylashgan hududning yozi issiq, qishi iliq boʻlib, oʻrtacha yillik havo harorati +14.1°C daraja boʻladi. Yoz mavsumida havoning maksimal harorati +46°C darajani, iyul oyida oʻrtacha 26.9°C darajani va qish davrida havoning minimum harorati -32°C darajani tashkil etadi. Oʻrtacha yillik yogʻingarchilik miqdori 370-380 mm ni tashkil etadi. Yogʻingarchilik asosan noyabr-aprel oylarida kuzatiladi. Eng koʻp yogʻingarchilik davri mart-aprel oylariga toʻgʻri keladi. Yillik oʻrtacha bugʻlanish 937 mm ni tashkil etadi.