O'rgimchaksimonlar

O'rgimchaksimonlar xelitseralilar kenja tipiga mansub bo'g'imoyoqlilar sinfi bo'lib, 0,1 mm dan 17 sm gacha uzunlikka ega. Og'iz organlari so'ruvchi, ko'zlari oddiy. Boshko'kragi ingichka poyacha orqali qorin bilan tutashgan yoki unga qo'shib ketgan. Qorinoyoqlari reduksiyaga uchragan yoki shaklan o'zgarib taroqsimon o'simta, varaqsimon o'pka yoki to'r bezlarini hosil qiladi. O'pka yoki traxeyalar orqali nafas oladi. Ayirish organlari - malpigi naychalari va koksal bezlar. Ko'pchilik o'rgimchaksomonlarda zahar bezlari bor. Kanalar, chayonlar, telifonlar, frinlar, tartaridlar, palpigradlar, fitsinuleylar, soxta chayonlar, solpugalar, pichano'rarlar, o'rgimchaklar turkumlariga bo'linadi.