Транспорт воситаларининг оний тезлигини мавжуд кўча шароитида аниқлаш ва таҳлил қилиш.

Транспорт воситаларининг оний тезлигини мавжуд кўча шароитида аниқлаш ва таҳлил қилиш.

Ишнинг мақсади. Транспорт воситаларининг оний ҳаракат тезлигини аниқлаш.

Назарий қисм 

Транспорт воситаларининг ҳаракат тезлигини секундомер билан ўлчаш учун йўлнинг чорраҳа ва тўғри қисмларида маълум бир масофа белгилаб олинади. Асосан ўлчов масофасининг узунлиги 50 м.дан (ҳаракат тезлиги кичик бўлган жойларда) - 150 метргача (ҳаракат тезлиги юқори бўлган жойларда) белгиланади. Транспорт воситаларининг кириш ва чиқиш вақтини аниқ белгилаш учун йўл ёқасига оқ-қора рангли бўёқ билан бўялган ишора таёғи ўрнатилади ёки йўлнинг қатнов қисмига кўндаланг белги чизиқлари туширилади. Кузатувчилар (талабалар) ҳаракат тезлигини ўлчаш учун аудиториянинг деразалари олдида реал кўча шароитида ўтаётган транспорт воситаларини ёки махсус ўрнатилган камера ёрдамида телевизор экранига узатилаётган, шунингдек аввалдан олиб қўйилган видеолавҳалардаги транспорт воситаларининг тезлигини секундомер ёрдамида аниқлайдилар. Кузатув натижаларини олдиндан тайёрланган жадвалга ёзиб боради. Кузатувчи транспорт воситасининг олди бампери ўлчов чизиғига кирганда дақиқа ўлчагични ишга туширади ва ўлчов масофасидан чиқишда уни тўхтатади.

Тезликни ўлчашдан олинган қийматлар 3-жадвалга ёзилади. Ҳаракат тезлиги тўғрисидаги натижалар математик статистика усули ёрдамида қайта ишланади. Олинган натижаларни статистик қайта ишлаш мисоли 4-жадвалда кўрсатилган. Статистик таҳлилнинг биринчи босқичи бир-бирига энг яқин қийматларни туркумларга бирлаштиришдан иборат. 4-жадвал қийматларидан фойдаланиб тақсимот эгрилиги ва жамланган тақсимот эгрилик графиклари қурилади.