Qadimgi Bobil

Bobil shahar-davlatning asoschisi va ilk hukmdori amoriy Sumuabum bo’lgan. Urushlar natijasida Ikki daryo oraligidagi davlatlar bir-birlarini kuchsizlantira boshlagan. Bundan foydalangan Elam podshosi Rim-Sin Janubiy Mesopotamiyani bosib olib Larsa shahrini o‘zining tayanch istehkomiga aylantiradi. Elam hukmdori Rim-Sin (m.av. 1822 -1763) Janubiy Mesopotamiyada katta-kichik suv inshootlari, kanallar qazdirib, Larsa, Ur va boshqa shaharlarda hashamatli ibodatxonalar qurdiradi. Ibodatxonalarga Shumer va Elam xudolarining mis va oltindan quydirilgan haykallarini qo'ydiradi. Mazkur davrda Janubiy Mesopotamiyadagi Uruk, Nippur, Isin va boshqa shaharlar Rim-Sin qo’li ostiga o’tib qoladi. Larsa esa Janubiy Mesopotamiyaning yirik markazlaridan biriga aylanadi. Mil.av. XIX-XVIII asrlarda Mesopotamiyada sug'orma dehqonchilik, savdo-sotiq rivoj topib shaharlarda yuksalish yuz beradi. Ammo Mesopotamiyada xo’jalikning yuksakroq darajada rivojlanishiga mamlakatdagi notinchiik to'sqinlik qilmoqda edi. Mesopotamiyadagi siyosiy, iqtisodiy va ijtimoiy vaziyat bu yerda kuchli markazlashgan davlat barpo bo’lishini taqozo etmoqda edi. Shunday sharoitda Mesopotamiya markazidagi Bobil shahar-davlati asta-sekin kuchaya boshlaydi. Bu shahar har jihatdan qulay geografik muhitga ega bo’lib, shahardan har tomonga ham quruqlik va ham suv savdo yo’llari kesib o’tgan edi. Bobil o‘z davrining yirik iqtisodiy, madaniy va hunarmandchilik markazi ham bo'lgan. Bobil esa eng yaqin qo'shnilari Kish va Akkadning tushkunligi va vayronligidan foydalanib, iqtisodiy va siyosiy jihatdan kuchaya boradi. Yuqorida ta’kidlanganidek, daryo va karvon yo’llari tutashgan yerda qulay joylashganligi uning yirik savdo-sotiq markaziga aylanishiga imkon bergan. Shahar va uning atroflarida Suriya cho'lidan ko’plab har xil buyumlar keltirilgan.