KURS ISHLARINI TAYYORLASH BO’YICHA USLUBIY KO’RSATMALAR

Mundarija

KIRISH.. 4

1. KURS ISHI USTIDA ISHLASHNI TASHKIL ETISH TARTIBI. 6

2. KURS ISHIGA QO’YILADIGAN ASOSIY TALABLAR.. 8

2.1. Kurs ishining tuzilishi 8

2.2. Axborotni yig’ish va qayta ishlash. 10

2.3. Dasturiy ta’minotni ishlab chiqish. 10

2.4. Algoritm blok-sxemalarini tasvirlash tartibi 10

2.5. Foydalanuvchi interfeysini ishlab chiqish bo’yicha tavsiyalar 11

3. KURS ISHINI SHAKLANTIRISH TALABLARI 14

4. FOYDALANILGAN ADABIYOTLAR.. 16

ILOVALAR.. 17

KIRISH

Kurs ishi — bu tanlangan yoki berilgan mavzu bo‘yicha kurs ishi rahbari boshchiligida talaba tomonidan olib boriladigan ilmiy ishning bir turi bo’lib, talabaning kasbiy ta’lim dasturi bo‘yicha ta’lim jarayonida olgan nazariy bilimlari va amaliy ko‘nikmalarini qo‘llay olishi , shuningdek, adabiyotlar bilan ishlay olishi, mavjud ma’lumotlarni umumlashtirish va tahlil qila olish qobiliyatini ko‘rsatadi. Talabaning kurs ishini bajarishi o’quv fanini o’zlashtirishning yakuniy bosqichida amalga oshiriladi va oliy ta’lim bilan mutaxassis tayyorlashning majburiy elementi sifatida joriy baholash shakllaridan biri hisoblanadi.

Kurs ishini bajarishda talaba o'rganilayotgan sohani qayta bayon qilishi, maqola va nashrlarning bo’laklarini yig’ib berishi kerak emas, balki materialga ijodiy ishlov berishi ko’zda tutiladi. Kurs ishi o'z ichiga tanlangan mavzu bo'yicha muammolarni talaba tomonidan mustaqil o'rganilishini nazarda tutadi, ya’ni kichik o’quv-ilmiy tadqiqot bo’lgani uchun mazmun va shakliga ko’ra ilmiy ish matni standartlariga mos bo’lishi kerak.

Kurs ishining maqsadi o‘rganilayotgan fan bo‘yicha kafedra yoki yetakchi o‘qituvchi tomonidan talaba tomonidan belgilab berilgan ish mavzusi bo‘yicha topshirilgan masalani yechishdan iborat. Berilgan masalaning yechimi sifatida o’zaro bog’liq bo’lgan matnli, dasturiy hamda grafik materiallar ko’riladi. Ishning matnli qismida talaba masala yechimi bosqichlarini turli yo‘llar: so’zlar, jadvallar yoki grafika (diagrammalar va chizmalar) yordamida ta’riflash orqali izchil va mantiqiy bayon qilishi va yechim usullarini asoslab berishi kerak bo’ladi.

Kurs ishining vazifasi sifatida quyidagilar ko’riladi:

• o'quv jarayonida talaba tomonidan olingan bilimlarni mustahkamlash, chuqurlashtirish, umumlashtirish va tizimlashtirish;
• ilmiy tadqiqot usullaridan foydalana olish;
• amaliy ko'nikmalarga ega bo’lish va berilgan ilmiy yoki ilmiy-texnikaviy masalani hal qilishda ijodiy yondashuvni rivojlantirish;
• nazariy tavsiyalarni, tahlil natijalarini malakali va ilmiy asosli shakllantira olish;
• turli axborot manbalaridan foydalanish va maxsus adabiyotlar bilan to'g'ri ishlash ko'nikmalarini shakllantirish;
• matnli va grafik hujjatlarni davlat standartlari talablari asosida tartiblash ko’nikmalarini shakllantirish.

Kurs ishini loyihalash va yozish bo'yicha uslubiy ko’rsatmalarni ishlab chiqishda quyidagi hujjatlar asos qilib olindi:

• O'z DSt 1215:2009. Ахборот, кутубхона ва нашриётчилик иши бўйича стандартлар тизими (АКНИСТ). Библиографик ёзув. Библиографик тавсиф. Умумий талаблар ва тузиш қоидалари;
• O'z DSt 2312:2011. АКНИСТ. Библиографик ёзув. Электрон кўринишдаги ахборот-кутубхона ресурсларининг библиографик тавсифи;
• ГОСТ 19.001-77. Единая система программной документации (ЕСПД). Общие положения;
• ГОСТ 2.001-2013. Единая система конструкторской документации (ЕСКД). Общие положения;
• ГОСТ 3.1102-2011. Единая система технологической документации (ЕСТД). Стадии разработки и виды документов. Общие положения;
• ГОСТ 7.80-2000. Система стандартов по информации, библиотечному и издательскому делу(ССИБИД). Библиографическая запись. Заголовок. Общие требования и правила составления;
• ГОСТ 7.32-2001. ССИБИД. Отчет о научно-исследовательской работе. Структура и правила оформления.

1. KURS ISHI USTIDA ISHLASHNI TASHKIL ETISH TARTIBI

Ma’lum mavzudagi kurs ishini bajarish o‘quv fanining yakuniy bosqichida amalga oshiriladi. Kurs ishi mavzulari fanning o’quv rejasida kurs ishlarini bajarish ko'zda tutilgan semestr boshlanishidan oldin fanni o‘tuvchi o’qituvchi tomonidan ishlab chiqiladi. Mavzular soni o'quv guruhidagi har bir talabaga shaxsiy vazifa berish uchun yetarli bo'lishi kerak.

Kurs ishi mavzulari dolzarb bo'lishi hamda fan, texnika va ta'limning hozirgi holati va rivojlanish istiqbollariga mos kelishi kerak. Taqdim etilayotgan mavzular fan bo'yicha o'quv rejasi talablariga javob beradigan ilmiy-tadqiqot, laboratoriyaviy izlanishlar, kompyuter dasturlari va berilganlar bazalari yordamidagi tadqiqotlar bilan bog'liq ish mavzularini o'z ichiga olishi mumkin. Shu bilan birga, kurs ishi mavzulari qisqa va aniq bo’lishi lozim.

Talaba kurs ishi mavzusini o’zining ilmiy va amaliy qiziqishlaridan kelib chiqib, o‘qituvchi taklif qilgan mavzular orasidan mustaqil tanlashi yoki maqsadga muvofiqligini asoslagan holda o’zining mustaqil mavzusini taklif etish huquqiga ega. Kurs ishining hajmi ruxsat etilgan hajmdan oshmasligi maqsadida ish jarayonida qo'yilgan masala yanada aniqroq etib qayta belgilanishi mumkin.

Kafedra tomonidan kurs ishi rahbari sifatida tayinlangan o’qituvchi talaba tanlagan mavzuni ro’yxatga oladi va kurs ishiga bevosita rahbarlik qiladi. Uning vazifalariga quyidagilar kiradi:

• kurs ishini bajarish bilan bog'liq barcha masalalar bo'yicha maslahatlar berish;
• talabaga ishga kerakli adabiyotlarni tanlashda yordam berish;
• tanlangan mavzu bo’yicha ishning asosiy uslubiyatini, o'rganiladigan savollar ko’lamini aniqlashga yordam berish;
• amalga oshiriladigan ishlar rejasini tuzishda maslahat berish;
• kurs ishining borishini nazorat qilish.

Rahbar maslahatlar berish vaqtida ishni bajarish jarayonida yuzaga kelayotgan muammolarni hal qilish bo’yicha talabaga ko’rsatmalar beradi, uchraydigan xatolarni tahlil qiladi va ularni bartaraf etishda oqil yechim topishga yordam beradi.

Talaba tomonidan kurs ishini bajarish jarayoni quyidagi bosqichlarni ketma-ket bajarishdan iborat:

1. tanlangan mavzuga oid adabiyot manbalarini o'rganish;
2. o‘rganilgan nazariy materiallar asosida qo’yilgan masalani yechishning turli usullarini tahlil qilish;
3. tanlangan mavzu yo’nalishini tavsiflovchi asosiy nazariy bilimlarning qisqacha shakldagi bayon qilish;
4. berilgan aniq masalani yechishning aniq usulini ishlab chiqish;
5. kurs ishini yozish talablariga muvofiq yozib chiqish.

Kurs ishini bajarish jarayonida talaba avvalo quyidagilarga e’tibor berishi lozim: