Yunus Rajabiy

Yunus Rajabiy

Yunus Rajabiy nomidagi “Maqom” ansambli yetuk musiqashunos olim, O‘zbekiston xalq artisti, akademik Yunus Rajabiy tomonidan 1959-yili O‘zteleradiosi qoshida tashkil etildi. Bu davrda ansambl 14 nafar sozanda va xonandalardan iborat edi. Ansambl tomonidan 1962-yildan “Shashmaqom” va “Toshkent-Farg‘ona maqom yo‘llari” turkumlariga kiruvchi asarlar ilk bora grammplastinkaga yozila boshladi. Mazkur jarayon hozirgi kunga qadar davom etib kelmoqda. E’tiborli tomoni shundaki, “Shashmaqom”ning Mushkilot va Nasr bo‘limlari to hozirgi kunga qadar 28 marotaba turli yetuk ijrochilar tomonidan qayta yozilgan. 1978, 1987-yillarda Samarqand shahrida bo‘lib o‘tgan simpoziumlarida ansambl muvaffaqiyatli ishtirok etdi. 1979-yili Tojikiston maqom festivali, 1980-yili Ozarbayjonda bo‘lib o‘tgan “Mug‘am” festivallarida O‘zbek milliy san’atidan xorijlik maqom shinavandalarini bahramand etishgan. 1976-yilda ansambl rahbari Akademik Yunus Rajabiy vafotidan so‘ng ko‘plab yetuk san’atkorlar unga rahbarlik qilib keldilar. Jumladan: 1976–1979-yillarda O‘zbekiston xalq artisti, betakror ovoz sohibi Orif Alimahsumov, 1979–1981-yillarda O‘zbekiston san’at arbobi Shavkat Mirzayev, 1983–1987-yillar davomida O‘zbekiston xalq artisti, yetuk bastakor G‘anijon Toshmatov, 1987-yildan O‘zbekiston xalq artisti, “Buyuk xizmatlari uchun” ordeni nishondori va ko‘plab davlat mukofotlari sovrindori Abduhoshim Ismoilov, 1998–2000 yilgacha O‘zbekiston xalq hofizi Isroil Vahobov, 2000-yildan hozirgi kunga qadar Abduhoshim Ismoilov rahbarlik qilib kelmoqdalar. Ansambl qariyb 54 yildan beri o‘z san’ati va milliy merosimizni xalqimizga yetkazib kelmoqda. Bu dargohda yetuk xonanda va sozandalar xizmat qilishgan. Xalqimiz ardog‘idagi san’atkorlar ko‘plab yetishib chiqqan.